Lerz

Gula Strîstanka piştî gelek nakokî û pevçûnan mêrê xwe dihêle û her du zarokên xwe li paş xwe dihêle. Ji Stenbolê dikeve rê û li Diyarbekirê bi cih dibe. Bi daxwaz û teşwîqa hevaleke xwe dest bi nivîsandina romaneke otobiyografîk dike. Lê hîn di nîvê rê de ye ku nikare projeya xwe ya romanê bi dawî bike. Destnivîsa netemam, ku paşê navê Lerz distîne, li Diyarbekirê dikeve destê nivîskarê navdar Brahîm Aram. Aram li ser bingeha tiştên ku berê hatine nivîsandin romanê temam dike û wê bi navê xwe çap dike.

Ev roman, ku ji aliyê du nivîskaran ve hatiye nivîsandin û bi lîstikên edebî hatiye şekildan, bi perspektîfên cuda yên vegotinê, pirdengehiya xwe û avahiya vegotinê ya tevlihev, pencereyekê li ser gelek aliyên civaka me vedike. Carinan rexneyê dike û me dixe nava nîqaşên li ser mijarên wek revandin, kuştin û bindestkirina jinan; serdestiya mêran, malbat û civak; nakokî û parçebûnên di navbera partî û alîgirên wan de; pevçûnên olî û neteweyî; korucîtiya gundan û çûna çiyê; komên xwendinê, civak û derdorên nivîskaran.

Pîro xwendevanan vedixwîne ku di dema xwendina Lerz de, di heman demê de romanê ji nû ve binivîsin.